~*~ السـلام عليـكم و رحمة الله و بركاته ~*~


شحـالكم عساكم بخير؟


حيــاكم الله في موضوعي..من زمااان ما حطيت موضوع في هالقسم


لكن حبيت تكون مشاركتي الـ 2000 مميزة ..و فكرت أحط هالموضوع..إن شـاء الله يفيدكم ^^








هذا الموضوع بيكون عن أول تجربه لي لعمل هالأكلات


أنا ما أحب وايد أطبخ ولا عندي خبرة وااايد في الطبخ ..لكن شوفوا شو سويت و شوفوا النتيجه ^^"

طبعا في أعضاء يزااهم الله خير شجعوني أطبخ و شرحولي طرق بعض هالأكلات


و أتمنى انتوا بعد تشجعوني..لأني مب وااايد أطبخ و ما أمارس هالشي ^^"


و اذا طبخت يعتبر شي إنجاااز بالنسبة لي خخخخخ








ما بطول عليكم..خلونا نبدأ بأول أكله..



~*~ كيكة التوفي ~*~



المقادير:

كأسا طحين
كأس سكر
3 بيضات
ملعقة بيكنج باودر
3/1 كأس زيت
3/1 كأس حليب


مقادير التوفي:

فنجانا سكر
مكعب زبدة صغيرة
علبة قشطة


الطريقة:

1-يخفق البيض جيداً مدة 5 دقائق ثم يضاف السكر و البيكنج باودر مع الاستمرار في الخفق.
2-يضاف الزيت و الحليب إلى الخليط مع الاستمرار في الخفق حتى يصبح الخليط مثل الكريمة.
3-يضاف الطحين بالتدريج و يضرب بالمضرب اليدوي حتى يمتزج جيداً.
4-يصب الخليط في قالب مدهون بالزبدة ثم يدخل فرن حار مدة 30 دقيقة أو حتى النضج.
5-لعمل التوفي: يوضع السكر على النار مع الزبدة حتى يذوب السكر و يأخذ اللون البني ثم تضاف القشطة مع التحريك المستمر حتى لا يتكتل السكر في القشطة و إذا تكتل يستمر في التحريك حتى يذوب تماماً.
6-عند إخراجها تترك لتبرد قليلاً ثم يصب عليها التوفي حتى يغطي الوجه و تزين ثم تقدم.


( الطريقة من كتاب اسمه " كتاب الطبخ الميسر" )


و نتيجة تجربتي كانت ناجحه الحمدلله ..بس كان فيها خطأ بسيط لكن تغلبت عليه..و الكيكة طلعت لذييييذه ~_^

و هذي صورها..










~*~ الدونات ~*~


المقادير:

3 أكواب طحين رقم 1
2 ملعقة خميره
1 ملعقة باكنغ بودر
1 حبة بطاطس متوسطه مسلوقه ومهروسه
3 ملاعق كبيره حليب بودره
1 فنجان زيت
1 فنجان سكر
1 فنجان ماء
قليل من الفانيليا


الطريقة:

تخلط المقادير الجافه مع بعض.. ثم تضاف باقي المكونات... وتخلط حتى تحصلي على عجينه لينه .. تترك لتتخمر 2 – 3 ساعه... او حتى ترتفع العجينه


طريقة عمل الدونات:

خذي جزء من العجينه ولا تنسين تغطين الباقي لانه العجينه لو نشفت ما بتنفع...وعلى سطح عليه طحين افردي العجينه وقطعي دوائر بواسطة كوب الشاي.. أما الزوائد رجعيها للعجينه المتبقيه... الدوائر قطيها من الوسط بواسطة غطاة قرشة الماي.. وحطيها في صينيه وغطيها بفوطه نظيفه عشان ماتنشف العجينه.. وبعد ماتخلصين في مقلى فيه كميه مناسبه من الزيت الحار اقلي الدونات وحمريها على دفعات .. وطلعيهن من المقلى في صحن فيه ورق او كلينكس عشان ينشف منه الزيت وبعدين حطيه في صحن التقديم المفروش بورق نشاف..وبعد ماتخلصين كل الدونات حطي سكر مطحون في مشخله و انثريه على الدونات


( الطريقة من شرح الشيف مسووو )


نتيجة الدونات نجحت عندي بعد..بس شكلي زدت السكر اللي عليه..و مع ذلك طلع لذيييذ

و كانت التجربه بالنسبة لي شوي صعبه..و ما توقعتها تنجح

و هذي صورة الدونات..




بس شكله طلع عبييط





~*~ سينابون بالككاو ~*~


المقادير:


مقادير العجينه:

كأسا طحين
½ كأس حليب بودره
½ كأس حليب طازج (غير بارد)
فنجان سكر
فنجان زيت
فنجان ماء دافئ
ملعقة صغيرة بيكنج باودر
ملعقة صغيرة خميرة فوريه
رشة ملح


مقادير الحشوة:

ملعقة كبيرة ككاو بودره
ملعقة كبيرة جرفه
ملعقة كبيرة سكر
25 جرام زبدة


مقادير صوص التوفي: (للتزيين)

فنجانا سكر
مكعب زبدة صغيرة
علبة قشطة
مقادير الصوص الأبيض: (للتزيين)
ربع قشطه
ملعقة صغيرة سكر


الطريقة:

1-تخلط المقادير التاليه: الطحين و الملح و الحليب بودره و البيكنج باودر
2-تخلط الخميرة الفوريه و الماء الدافئ و تترك 10 دقائق ثم يوضع عليها الحليب و الزيت
3-تصب الخلطة رقم 2 على الخلطة رقم 1 و تعجن ثم تغطى و تترك ساعه حتى تختمر
4-لعمل الحشوة: يخلط الككاو و الجرفه و السكر فقط (الزبدة تستخدم لدهن العجينه)
5-تفرد العجينه بعد دهنها بالزبده على سطح عليه طحين و يوضع عليها الككاو و الجرفه و السكر و تلف (مثل شكل البيب) ثم تقص الى قطع صغيرة
6-توضع القطع في صينيه عليها قصدير مدهون بالزبده (مع ضغطها)
7-توضع في الفرن حتى تحمر (نصف ساعه تقريبا)
8-لعمل التوفي: يوضع السكر على النار مع الزبدة حتى يذوب السكر و يأخذ اللون البني ثم تضاف القشطة مع التحريك المستمر حتى لا يتكتل السكر في القشطة و إذا تكتل يستمر في التحريك حتى يذوب تماماً

9- يزين بالصوص



( الطريقة من شرح الشيف مس هولمز )


و النتيجة نجحت عندي الحمدلله..هذي ما كانت أول تجربه لي..بس هالطريقة أول مرة أجربها

سويت سينابون قبل لكن بطريقة ثانية..كان بالجرفه

لكن هذا بالككاو عيبني أكثر -yes0" class="inlineimg" /> لأني ما أحب الجرفه وااايد


و هذي الصور..


هذا السينابون اللي سوته مس هولمز..




و هذا اللي سويته أنا..







مثل ما شفتوا..أغلب الأكلات اللي سويتها سويتات و هذي أشياء بسيطه

و الحين بخليكم مع الأكله الدسمه..اللي كنت متخيله انها وااايد صعبه بالذات يوم شفت طريقتها و ما كنت متشجعه أسويها

لكن مسووو شجعتني عليها..و يحليلها صبرت علي واااااايد..من الصيف وهي تترياني أسويها خخخخخ

و ما سويتها الا في بدايه هالاجازة..قبل اسبوعين تقريبا





~*~ اللزانيا ~*~




المقادير:

· عجينة اللزانيا ( جاهزة )
· لحم مفروم
· 2 بصل متوسط مفروم
· 3 فص ثوم ناعمه
· 2 طماط صغار ( تقطع صغار وتفرم بفرامة البصل )
· عصير طماط ( 2 طماط كبار تقطع وتوضع في المولينكس )
· 2ملعقة كبيره صلصل طماطم
· رزمة كوزبره وبقدونس تقطع صغار
· 1 جزر مقطع صغار جداً ( مجرد إضافه يمكن الإستغناء عنها )



مقادير الباشميل او الصلصل البيضاء

· 1 كوب طحين رقم 1 او طحين الكيك ( نفس الشي )
· 7 ملاعق حليب بودره
· 4 اكواب ماء ( كوب الجبن )
· 1 كوب زيت بس مب متروس

الطريقة:

العجينه:
توضع عدد من شرائح عجينة اللزانيا بدون " تكسير" في قدر مملوء بالماء ويوضع عليه قليل من الزيت ونتركها تنطبخ حتى تستوي
انتبهي لا تلصق العجينه في القدر.. حركيها بين فتره وثانيه شوي شوي عشان ما تتكسر ويفضل أن يكون القدر كبير...بعد ما تخلص من الطبخ اشخليها في مشخله ( صفايه ) كبيره

الحشوه:
يوضع اللحم في ماء ويوضع اعواد جرفه ومسمار و بصلتين صغار مقشرات بدون تقطيع وفصين ثوم ونتركه يغلي حتى يستوي.. وبعدها يشخل ونشل عنه الجرفه والبصل و...الخ
في مقلى ضعي قليلا من الزيت..و ضعي البصل والثوم وحمسيه شويه حتى يحمر... ثم ضعي الجزر وحمسي شوي ... ثم ضعي الطماط المفروم... ثم ضعي اللحم المفروم وحمسيه حتى يختلط الطمام مع اللحم المفروم... ثم ضعي عصير الطماط واخلطي المكونات جيدا ..ثم ضعي ملعقتين الصلصل.. ثم ضعي البهارات: الملح والفلفل الأسود والكمون و ( البزار و الفلفل الأحمر >> اختياري)... حمسيه قليلا حتى تختلط البهارات مع المكونات وآخر شي ضعي الكوزبره والبقدونس .. في النهايه غطي المقلى وخليه على نار هاديه حتى تخف الصالونه وتصبح حشوه ليست ناشفه

الباشميل:
جهزي في طاسه 7 ملاعق حليب جاف ومع 4 اكواب جبن..اخلطيه وضعي فيه الفلفل والملح
في جدر كبير ضعي كوب طحين ... حمسيه قليلا ومن يبدأ يتغير لون الطحين على طول ضعي الزيت,,اخلطيه فتره بسييطه وبعدين ضعي الحليب عليه مع التحريك بإستمرار حتى يصبح غليظ..وبعد الانتهاء اغلقي النار عنه و ضعي عليه جبن موزيريلا


بعد الانتهاء من عمل الحشوه والباشميل والمعكرونه..

ادهني صينيه بالزيت لوضع اللزانيا عليها
ضعي طبقه واحده من اللزانيا في القاع (يفضل أن تصف باليد حتى لا تتقطع)
بعد طبقة اللزانيا ضعي قليلا من صلصلة الباشميل وبعدها حشوة اللحم وبعدها طبقة صلصلة الباشميل وضعي عليها جبن موزيريلا.. وهكذا.. لازنيا بعدها بشميل بعدها حشوه وبعدها بشميل وبعدها جبن
آخر طبقة في السطح هي صلصلة الباشميل..ادهني السطح بقطعه صغيره من الزبده ثم غطيها كلها بجبن الموزيريلا مع مكعبات من جبن كرفت الأزرق
ضعيها في فرن حار فترة قليلة (نص ساعه أو أقل بحسب حرارة الفرن)...و في النهايه شغلي الفرن عليها من فوق حتى يحمر الوجه

( طبعا الطريقة من الشيف مسووو )


طريقة عملها صعبه شويه..و النتيجة ما ضبطتها 100%..الملح كان ناقص شويه

و الباشميل استوى عندي غليظ شوي..لكنها بشكل عام طلعت لذيييذه

و كأول تجربه بالنسبة لي تعتبر جيدة..حتى في ناس جربوها و طلبوا مني طريقتها


و هذي صور منها..


هذي اللزانيا من يد الشيف مسووو..





و هذي اللي أنا سويتها..














و صحه و عافيه

.بس هذا اللي عندي الحين..طبعا أنا طبخت أشياء ثانيه مب بس هالأشياء



سويت أنواع ثانيه من الكيك منها كيكة النسكافيه و بسكويت بالفانيليا و الككاو و سويت بلاليط مع بيض



و سويت عيش (رز) و أشياء ثانيه بعد ما أذكر الحين ^^"




شو رايكم بهذي الأكلات؟..ما عليكم من شكلها ادري انه ما يشهي



جربوووها و ذوقوها..لذييييييذه لا تفوتكم ..و إن شاء الله تعيبكم



و إذا أي حد جرب شي من هالأكلات يخبرنا النتايج










في النهايه..ما أنسى أشكر الشيف مسووو و مس هولمز على شرحهم لي لهالأكلات و تشجيعهم




يزاهم الله خير و يعطيهم العافيه ما قصروا -flowers0" class="inlineimg" />..










~*~ في أمان الله ~*~